ఆశ తీరదు

 తెలుపునఁ దేలు మరాళముపైని సతీ సరస్వతి రూపముం
దలచి యొకింత విశేషపు భంగిఁ బదమ్ముఁ బాడగనెంచితీ
యలసట తక్క కృతార్థత కల్గక యాశతీరదు, శుద్ధమౌ
లలిత పదాళిని ధారనొసంగు విలాసమెన్నడు జూపెదో!

 

-- లక్ష్మీదేవి.

వనమంజరి 

సరస్వతీ!

 కంటికి కానరాదెచట, గంధము దాచుట క్లిష్టమౌ, సదా
కంటకఛేదియై యొనరు, గౌరవమెప్పుడు వృద్ధిఁజేయు, తా
వెంటను వచ్చునెన్నటికి, ప్రీతినిఁ బంచిన హెచ్చు, నట్టి సొ
త్తంటి సువిద్యనిత్తువని తల్లి సరస్వతి! నిన్ను చేరుదున్.

 

-- లక్ష్మీదేవి.

ఉత్పలమాల 

సద్యోజాత

 తల్లీ! దండములమ్మ ! నవ్యనవనీతంబైన సింగారమై
కల్లోలంబుల పాల సంద్రమున, బంగారంపు పూబంతివై
యుల్లాసమ్ముగ నేల గర్భమున, సద్యోజాత సన్మూర్తివై
ఫుల్లాబ్జాక్షి జనించి, శ్రీహరిని సమ్మోహించి చేబట్టితే!

 

-- లక్ష్మీదేవి.

శార్దూలవిక్రీడితము

 

మనోజ్ఞ

 కమలమవై విలసిల్లి కాంతుని సేవకై

భ్రమరమువై తపియించి బాధలకోర్చు నీ

సమమెవరే సిరిదేవి, చంద్రుని సోదరీ!

సుమములతో కయిమోడ్తు, జోతలఁగొనుమా!

 

-- లక్ష్మీదేవి.

మనోజ్ఞవృత్తము 

పెంజీకటి

 పరిచయమైన రూపు, పసిపాపనుఁ బోలిన నవ్వు, చల్లనై
విరిసిన కంటిచూపు, కడు భీతినిఁ బారగఁ ద్రోలు శౌర్యముం,
దరగని కాంతితోపు ముఖదర్శనమెల్లను వీడి, జ్ఞానియై
చిరు దరహాస ముద్రఁ బెనుఁ జీకటికవ్వలి కాంతిఁ దల్చుటో!!

 

-- లక్ష్మీదేవి.

ఉత్పలమాల

 

దిక్కెవ్వరో!

 మోహావేశముతో భ్రమించి జగతిన్మూర్ఖమ్ముగా నమ్ముచున్
బాహాటమ్ముగ నేఱరానివగు దుర్వారంపు లోకుట్రలన్
దేహాత్మల్ బలియైన వేళ నకటా! దిక్కెవ్వరో స్వామి! నీ
సాహాయ్యమ్మునుఁ గాక నాకు, కలదా సందేహమింతైననున్.

-లక్ష్మీదేవి

శార్దూలవిక్రీడితము

ద్వ్యా

 సద్వ్యాసంగములందు నుండగల యిచ్ఛాశక్తి సంకల్పమున్,

సద్వ్యూహమ్ములతోడ యత్నమును,సంస్కారంపుసంసర్గమున్

హృద్వ్యాధ్యాదులనుండి రక్షనిడు నే యే ప్రాయమందైన, నీ

షద్వ్యంగమ్మును లేదు, సత్యమిది విశ్వాసమ్ము నీవుంచుమా.

- లక్ష్మీదేవి

శార్దూలవిక్రీడితము

ద్వ్యా ప్రాస